السلام عليكم ورحمة الله وبركاته ..

بما انك د.نفسي اعتقد انك تعرف مدى وشدة تأثر الفتاة بما يحصل لها في صغرهاانا يا دكتوري الفاضل لدي اختان وانا الكبرى بينهن .

الفارق بين كل وحدة والثانية مايقارب سنة ونصف . المهم يا دكتور من كنا صغار و ثنينهن علي في كل شيء كلام… اهانات … ضرب … وحتى تحريض للي حولنا والدين او اخوالي واعمامي على اني انسانه فضيعة و لاتطاق واني اظهر لهم ( لناس) مااخفيه (في البيت ) ..

 

ولاتنخدعون فيها ومن هالكلام …مع اني يا دكتور ما اعرف اتكلم كلام شين مااعرف اسب ما اعرف اشتم اصلا ما اعرف اسوي ذي الاشياء …واحاول دايما اني اتجنب المشاكل … و لا احتمل اني اضرب اختي او أي احد .. ما اطيق هذا الشيء وان فعلت احاول اني ما ابكيها .

 

مواقف : اذكر مرة ضربتها لما بكت … اضربها وابكي معها .. اضربها وابكي معها واقول بنفسي ( سامحيني ماودي اضربك لكن مايصير تتمادين .. مايصيـــر )
و والله يادكتور اني ندمااانه على هذا الموقف بالذات …مع انها كانت هي الي بدأت الضرب
( كالعادة دائما )

وفيه موقف ثاني صار لي ماني قادرة انساهـ لمن كنت اولى متوسط واختي سادس ( في نظري انها عاقله وكبيره ) .. وقتها صارلنا حادث انكسرت رباعيه امي ..ولزمت سريرها وانا انكسرت رجلي ودخل قزاز السيارة براسي ..

وبعد ماكنت قادرة اترك السرير وذاك اليوم حسيتا ني شوي تعافيت ( من الصداع والالم الي صابني من القزاز ) وجلست مبسوطة اني جلست لي اسبوع متمدده ع الفراش .. والاعب اخوي الصغير اصغر واحد..

المهم و اختي (سادس) تقول لاختي الي اصغر منها (رابع)… يالله فرصة بما انها ماتقدر تتحرك خلينا نقوم عليها نضربها لين تبكي ..وتقول لاخواني الصغار كلهم وهم ثلاثة ..

تخيل يادكتور خمس فوق راسك يضربونك بالجزم (الله يكرمك ) وانت ماسويت شيء وماتقدر اصلا تسوي شي ..ومن مين من اخوانك .. واقعد ابكي بس والله مو من الم الضرب من الم الموقف … ابكي واستنجد بالي يضربوني ..وابكي واقول لامي شوفيهم يمه يضربوني يمه ماسويت لهم شيء ..

قالت لي امي: انتي شايفتني اقدر اسوي شيء ؟. حنيت على امي التعبانه وحطيت ايديني على موضع القطع الي براسي .. وانحنيت و كتمت دموعي وسكت … تخيل يادكتور .. ضربوني لين تعبو …!!!

يا دكتور انا الان عمري 20 سنه … الحمدلله ربي رزقني ودخلت تخصص نظم معلومات ورزقني بالدراسة بالمدينه المنورة … ورزقني بان تقدم لخطبتي ابن خالتي ( وهو الرجل الذي كنت اتمناهـ واحاول اني انسي نفسي هذي الامنيه الاشبه بالمستحيله لانه متاخر دراسيا )

المهم مرة كنا جالسين و قلت اني خايفة منه لاني ما اعرفه زين .. طارت في وجهي اختي وقالت: اصلا هو مايبغاكي … قلت:الا يبغاني .. قالت : لا لا مايبغاكي .. قلت : الا والله يبغاني

قالت : لا والله العظيم انه ما يبغاكي و ابوي يقوله تكذبين ابوي ؟انا سمعت كلمت تكذبين ابوي وسكت …وقلت لامي السالفه … ونادتها امي تعالي انتي ليش تقولين لاختك كذا وكذا …وانقهرت
واجهها راح فيه من الاحراج ونظرت فيني بقهر وقالت : رايحة تقول لامي ..!

قالت امي : ايه تقولي … وخليني اسمعك تقولين لها هالكلام … هو لوما يبغاها ما سوا و سوا … وابوك خايف عليها لانه مو موظف ومتاخر ..ماقال مايبغاها …

وغيره من اختي الي اصغر منها … كانت معها لكنها اقل اساءة ..اذكر قريب عقب ماتزوجت اختي الصغيرة الثالثة ..جاتنا البيت وقلت لها \بضحك احنا بنطلع يلا معانا ..يلا بتمشين ولا اخليك لوحدك يلا امشي ..

قالت لي باحتقار شديد : اصلا انتي موجوده او مو موجوده كله واحد …طبعا الحديث يطول لكني ما بقولك قصة حياتي …اسفه يادكتور..عارفة طولت عليك لكن تحملني شوي ..

المشاكل1.انا الحين يادكتور صايره ما اثق باحد من البنات خاصة تدري …اصلا اخاف اني اثق باحد وانصدم فيه بعدين .. ( اختي ذي الي بعدي معروفة انها مطوعة البيت … وان مافيه مثلها باخلاقها وفلله وتوسع الصدر ..)

فماني قادرة يعني مو كل من كان ظاهرة طيب معناته انه طيب … لان فيه ناس ( وهم الاسوأ ) الي يعتبرون الطيبة والاخلاق مجرد برستيج لازم اظهر به قدام الناس ….

وفيه بنت وحدة وثقت فيها وفعلا اعتبرها صديقة ماشاء الله تخاف ربها فبل كل شي .. لكني احاول ابعد عنها مدري ليه ..مع اني احبها …! بس مني قادرة تلقائيا ابتعد .. ايه انا اقولك انا افعل كذا كذا من اجل صديقتي ..لكن ماني قادرة استوعب ان احد يسوي شيء عشاني !!

2.يادكتور انا بعد قاهرني شيء … ابغاك تساعدني به .. ليه انا الي انظلم وانا الي احمل الحقد والكره ؟؟ ليه ؟؟ وهم عادي ولا كانهم سوو شيء .. مايندمون ع الي سووه ..؟ولايحسون بشيء ..؟؟شيء محير من جد

3.ابغى اتخلص من هالشي الي بقلبي ( ما ابغى اقوله ).. لكن مو قادرة خاصة بعد ماتكلمت عن خطيبي …واختي الثالثة لما قالت لي ( وانا استلطفها ): اصلا انتي موجوده او مو موجوده كله واحد ..

4.خطيبي …خايفه لما اتزوج اني ما اوفيه حقه .. ما اسعده ..من جد خايفة عليه..ايه احبه بس خايفه والي يخليني اخاف اكثرواكثر انه ولد خالتي خايفة من تدخل العائلة بيننا باي شكل ..فايش تنصحني به ؟؟

( ولا تقول اتركيه مستحيل ) فيه كمان شيء نسيت اقوله انا بجد مااحب اروح لاحد الا اذا كانو خالاتي … استانس في البيت واذا اتجمعو ا الناس الي احبهم في بيتنا .. وكمان استانس لما اكون وحدي …وبس واسفه جدااا ع الاطاله ..


اسم المستشير zaiab
__________________________


 رد المستشار       أ. غادة ناصر المسعود


إلى الأخت الكريمة :

بعد التحية والسلام والتفحص والتمعن لكل ما ذكرته عن حياتك الماضية , وعن طبيعة علاقتك بأخوتك , من الواضح أن ذلك كله ترك بصمات وأثار سلبية على شخصيتك !!!.


عزيزتي لو جلست مع نفسك جلسة صريحة وصادقة لوجدت أن كل ما ترينه معاناة وعذاب في نظرك عانيته في صغرك ,صادر من أخوتك الصغار !!!؟؟؟


وقد نقول أن فيهم جانب من العدوانية ولكنهم كانوا صغارا !! , واسمحي لي غاليتي إن صارحتك بسبب مشاكلك ومعاناتك من صغرك وحتى الآن , هو شخصيتك السلبية من طفولتك وحتى الوقت الراهن وما تبعه ذلك من فقدانك لثقتك بنفسك وبمشاعرك , وتبعه أيضا فقدنك للثقة بالآخرين وبمشاعرك اتجاههم !!.


أختي الكريمة توجد حكمة تقول (من كان على نفسه قادر فهو على غيره أقدر!! )

وأخرى تقول ( إدارة الذات أصعب من إدارة الناس !! ), ولهذا فإن عليك جهد عظيم وكبير لتغيير نفسك أولا وتطويرها , ودعم ثقتك لنفسك الذي سيتبعه زيادة الثقة بمشاعرك وبالآخرين .


تذكري أختي أن الإنسان قليل بنفسه وكثير بإخوانه , فاحرصي على تحسين علاقتك بأخوتك ولا تنظري للماضي لأن ذلك سيوقفك !!

ولا تنسي أنك أنت الأكبر وأنت القدوة لهم في الصفح عنهم ومسامحتهم وفتح صفحة جديدة معهم !! .

فالشيطان وأفكاره الشيطانية والسوداوية كانت حاضرة فيما بينك أنت وأخوتك , والدليل تذكيره لك باستمرار لمل فعلنه لك منذ الطفولة حتى الآن ؟؟؟


وما يؤكد رضوخك واستسلامك لأفكار الشيطان وتحليلاته , هو أني أجد أن شخصيتك فيها من الطيبة والمحبة والعطاء والقدرة على التسامح .

وهذه الخصال لا تتفق مع هوى الشيطان ومكائده , فاحرصي على دحر وإبعاد تأثيره عليك , واستعيني بالله على أن يقدرك على نفسك أولا , ولا تنسي قوله تعالى (أن الله لا يغير ما بقوم حتى يغيروا ما بأنفسهم ) .

واحرصي على تطوير نفسك وزيادة ثقتك بنفسك من خلال قراءة الكتب المتعلقة بتطوير الذات , أو حضور دورات لذلك , أو الاستماع للأشرطة والمحاضرات لتطوير الذات مثل : كتب الدكتور طارق الحبيب وأشرطة الدكتور جاسم المطوع والدكتور عبدالله هادي والدكتور مريد الكلاب وهناك الكثير الذي ستجدين ما يناسبك منها بإذن الله .

وفقك الله لمل يحبه ويرضاه .